Komið þið sæl og verið hjartanlega velkomin.

Ég segi haustfund  2018 settan.

Ritari fundar er Guðmundur Óli og fundarstjóri er Engilráð Margrét Sigurðardóttir.

Fel ég  fundarstjóra kynningu dagskrár og stjórn fundar.

Ágætu félagar! Gaman að sjá ykkur aftur. Margt hefur eflaust á daga ykkar drifið frá því við kvöddumst í vor, og vonandi eigið þið góðar og gleðilegar minningar frá sumrinu. Nokkrir félagar hafa kvatt og verður þeirra að venju minnst á aðalfundinum í vor.

En nú haustar að og starfsemin í Húsi frítímans er að hefjast að venju. Dagskrá vetrar fram að áramótum hefur verið auglýst í Sjónhorninu og á heimasíðunni. Starfsemin eins og þið þekkið er í nokkuð föstu formi, lítið breytt út af vana. Spilin, leikfimin, boccia, gönguhópurinn, skákin, handavinnan, leshópurinn allt á sínum stað. Sönghópurinn æfir í Ljósheimum og Helga Bjarnadóttir stjórnar áfram Löngumýrarstarfinu. Jóna Heiðdals verður áfram með handavinnuna og föndrið og með henni verður Helga Hjálmarsdóttir. Alda kvaddi okkur í vor og eru henni þökkuð vel unnin störf. Helgu bjóðum við velkomna. Þá vil ég minna ykkur á tilboð veitingahúsanna, endilega notið þá þjónustu af og til.

Frá því við kvöddumst í vor hefur heilmikið verið um að vera. Mikið var um að vera hjá íþróttanefnd – sömuleiðis ferðanefnd, fáum við að heyra frá þeim eins og fundarstjóri gat um í kynningu á dagskrá.

Formaður og varaformaður sátu aukalandsfund LEB á Seltjarnarnesi 24.apríl s.l.

Þar ávarpaði okkur nýskipaður félags-og jafnréttisráðherra Ásmundur Einar Daðason, vinsamleg orð látin falla og vilji sýndur til góðra verka. Mun tíminn leiða í ljós hvort svo verður.

Aðalfundarefni þessa aukalandsfundar voru lagabreytingar skv. tillögum laganefndar LEB. Gunnar Eydal fór fyrir þeirri nefndarvinnu og var búið að kynna tillögurnar fyrir aðildarfélögum LEB. Samþykkt var að fella niður formannafundi a.hv. ár, en landsfund skal halda árlega einn dag í senn. Landsfundarfulltrúm skal fækka, þó þannig að hvert félag eigi þar sína rödd. Hvert aðildarfélag á rétt á einum fulltrúa félags með einn til 150 félagsmenn, tveimur fulltrúum með 150-300 félagsmenn og síðan einum fulltrúa fyrir hverja 300 félagsmenn til viðbótar, eða brot úr þeirri tölu til setu á landsfundi. Nokkrir liðir voru samþjappaðir og styttir. Tillögurnar voru samþykktar á fundinum. Fulltrúar voru almennt ánægðir með afgreiðslu mála. Það fyndna við fundinn var – að honum var eiginlega aldrei slitið.

Bendi ég ykkur á heimasíðu LEB, en þar er að finna lög LEB með breytingum.

12.júlí s.l. heimsótti okkur Friðgeir Guðmundsson og kona hans Ester Óskarsdóttir, erindi hans var að færa félaginu að gjöf möppu með uppdráttum og teikningum af munstrum fyrir tréútskurð, Friðgeir hefur í mörg ár og áratugi kennt tréútskurð, og er afar vel kynntur af sínum störfum. Nokkrir af útskurðarnemunum frá í vor komu saman ásamt formanni til að taka við gjöf þessari.

Þess ber að geta að heimsóknin var boðuð með stuttum fyrirvara og vægast sagt erfitt að ná fólki saman, en óneitanlega hefði verið gaman að hafa aðstöðu til að taka myndarlega á móti gestunum.

Læt svo þess getið að útskurðarhópurinn leitar að húsnæði fyrir listsköpun sína.

Eflaust og vonandi hafið þið tekið eftir orðræðu og skrifum öllum  –  sem fjalla um réttindamál eldri borgara. Af nógu er að taka og hreint óskiljanlegt hvað ráðamenn skipta fljótt um skoðun varðandi málaflokk e.borgara, og eru tvísaga.

Í Fréttablaðið skrifar Björgvin Guðmundsson fyrrverandi þingmaður og borgarfulltrúi oft greinagóða pistla um aðförina að eldri borgurum. Björgvin hefur það umfram flesta að hafa skilning, vit og rökfestu máli sínu til stuðnings. Ég hvet ykkur til að lesa greinarnar hans. Eins skrifar Helgi Seljan oft snjalla pistla um þennan málaflokk.

Það voru gleðilegar fréttir sem bárust frá Velferðarráðuneytinu um samning ráðuneytisins og sjúkratrygginga vegna tannlækninga aldraðra. Greiðsluþátttaka sjúkratrygginga hækkar almennt úr 27% í 50%. Tóku þessi lög gildi 1.sept. Þessu ber að fagna

-Á liðnu vori rétt fyrir kosningar barst út að stofnað hefði verið öldungaráð innan sveitarfélagsins Skagafjörður. Það var langur aðdragandi að þeirri samþykkt og frekar klaufalegt ferli. Skv. lögum átti FEBS að eiga tvo fulltrúa og tvo til vara, og var óformlega tilkynnt að fundarseta öldunga á löglega boðaða fundi yrði án greiðslu. Okkar hugsun var ekki sú að ná okkur í einhverjar krónur, en þetta sýnir svolítið viðhorfið til öldunganna. Það skal tilkynnt hér og nú að enn hefur stjórn FEBS ekki fengið formlega tilkynningu um stofnun ráðsins eða ósk um tilnefningu fulltrúa í ráðið.

21.júní s.l. kom tilkynning um ný og breytt lög um félagsþjónustu sveitarfélaga sem taka gildi þann 1.okt.2018. Meðal nýmæla er að öldungaráð taka við því hlutverki sem þjónustuhópum aldraðra hefur fram til þessa verið falið að sinna. Er ráð fyrir því gert að öldungaráð starfi í hverju sveitarfélagi eða á grundvelli samvinnu milli sveitarfélaga.

Öldungaráðum er fyrst og fremst ætlað að vera formlegur vettvangur fyrir samráð við notendur um öldunarþjónustu. Samsvarandi skipan kemur til framkvæmda þann 1. október nk. varðandi notendaráð í þjónustu við fatlað fólk til samræmis við breytingar á lögum um félagsþjónustu sveitarfélaga.

Þar sem öldungaráðum er hins vegar ætlað að taka við hlutverki þegar gildandi þjónustuhópa er rétt að hafa neðangreind atriði sérstaklega í huga við það val fulltrúa sem nú fer fram á vettvangi nýkjörinna sveitarstjórna:

1. Við næstu endurskoðun á samþykktum sveitarfélags um stjórn og fundarsköp verði öldungaráð talin upp meðal annarra nefnda, ráða og stjórna sem sveitarstjórn kýs fulltrúa í (þessi upptalning er yfirleitt í staflið sem kemur á eftir fastanefndum sveitarstjórnar). Fulltrúum sveitarfélags í öldungaráði er með þessu veitt staða sem er hliðstæð fulltrúum þess á aðalfundum landshlutasamtaka og vettvangi annarra aðila af svipuðum toga. Í samþykktinni ætti að vísa til þess á kjörið fari fram á grundvelli 2. mgr. 38. gr. laga nr. 40/1991, um félagsþjónustu sveitarfélaga (með síðari breytingum) með hliðsjón af 8. gr. laga nr. 125/1999, um málefni aldraðra (með síðari breytingum).
2. Kjör á fulltrúum sveitarfélags í öldungaráði fari fram þegar samþykktir hafa verið endurskoðaðar. Sú leið er einnig möguleg, þar sem öldungaráði er ætlað að leysa af hólmi þjónustuhópa sem hingað til hafa starfað (að nafni til þó í flestum tilvikum), að fulltrúar sem sveitarstjórn velur til setu í þjónustuhópi á fyrsta eða öðrum fundi sínum eftir nýafstaðnar sveitarstjórnarkosningar verði sjálfkrafa að fulltrúum sveitarfélagsins í öldungaráði. Þetta er þó háð því að sama skipan verði áfram á samstarfi um þjónustusvæði þar sem það á við.

Þess ber að gæta að öldungaráð hafa almennt ekki formlega stöðu innan nefndakerfis sveitarfélags. Af því leiðir að hvert öldungaráð fyrir sig setur sér starfsreglur um framkvæmd verkefna, þar á meðal gerð tillagna til sveitarstjórna um öldrunarþjónustu.

Samband íslenskra sveitarfélaga  vinnur nú að greinargerð um þau atriði sem sveitarfélög þurfa að huga að samhliða gildistöku nýrra og breyttra laga. Greinargerðin verður send sveitarfélögum auk þess sem svör við algengum spurningum verða aðgengileg á vef sambandsins.

Svo mörg voru þau orð: Ég endurtek, stjórn FEBS hefur ekki fengið formlega tilkynningu um stofnun öldungaráðs og því síður beiðni um tilnefningu fulltrúa.

Nóg um það. Nú erum við að byrja vetrarstarfið og ætlum að hafa það skemmtilegt. Kaffi og meðlæti verður með sama sniði og undanfarin ár – verð það sama. Hvaða starfsmaður verður hér í Húsi frítímans okkur til aðstoðar hef ég ekki hugmynd – en vonandi leysast þau mál sem annað.

Í dag hjálpumst við að  – með kaffið og spilin.

Þann 29. ágúst 2018 lögðum við af stað til Seyðisfjarðar þar sem ferjan Norræna var tekin til Færeyja.  Við vorum 46 þ.m.t bílstjórinn.  Það fór vel um okkur á ferjunni og fengum við lens alla leiðina til eyjanna, sem er 18 klukkustunda “stím”.  Við fórum víða um Færeyjarnar og nutum fegurðarinnar þar, skoðuðum sögustaði, heimsóttum Norræna húsið, litlu bæina, sóttum messu í Klakksvík og fórum á búðarrölt.    Hinn frábæri leiðsögumaður og bílstjóri var Sveinn Sigurbjarnarson hjá Tanna Travel.  Fararstjóri okkar var Helga Sigurbjörnsdóttir.  Við dvöldum á “Hótel Færeyjar”, fallegu hóteli í útjaðri Þórshafnar.  Þar fór vel um okkur í hvíld, mat og drykk.  Hópurinn var góður og þar sannaðist að maður er manns gaman.  Veðrið lék við okkur en við fengum þó að kynnast rigningu eyjanna og rokinu í kirkjuferðinni í Klakksvík!!!  Heim var haldið með Norrænu þann 3. september og þá “vögguðu okkur bárur” í vestan golu.  Ferðanefnd þakkar ferðafélögum ánægjulega daga og vonar að fólk hafi haft gleði og gaman af þessari ágætu ferð.

Fh. ferðanefndar:  Kristín Björg Helgadóttir

Dagsferð í Hrísey:

Dagsferðin var farin 13. júní kl. 09:00 var lagt land undir hjól og ferðinni heitið í Hrísey.  Komum þangað kringum kl. 12:00, fórum þá beint í súpu með kaffi á eftir. Síðan beið vagninn góði og traktorinn eftir okkur, ók hann með okkur um Eyjuna, með leiðsögn,  var  það mjög gaman en frekar í kaldara lagi.   Ferjuna tókum við síðan í land kl. 15:00.  Áttum pantað í bjórverksmiðjunni Kalda á Ársskógströnd. Þar fengum við frásögn um verksmiðjuna og smakk á framleiðslunni í merktum bjórglösum, sem voru til eignar.  Þaðan lá leiðin út á Siglufjörð.
Þar áttum við pantað síðdegiskaffi og rabbabarapai með rjóma hjá Rauðku. Veitingum voru gerð góð skil.
Eftir það var brunað í Skagafjörðinn, fram Blönduhlíð því þar skiluðum við framfjarðarliðinu af okkur.  Á Krókinn komum við kringum kl. 19:00 um kvöldið.
Bíll og bílstjóri var frá Suðurleiðum og Gísli Rúnar sjálfur við stýrið á splunkunýrri rútu, var hann mjög góður að venju.

Færeyjar:

Á haustdögum 2017 var ákveðið að fara til Færeyja síðsumars 2018. Ákveðið var að ganga til samninga við ferðaskrifstofu Tanna Travel að ábendingu Norrænu ferðaskrifstofunnar, sem sagði að Svenni (Sveinn Sigurbjarnarson) hjá Tanna vissi mest um Færeyjar.  Þá vorum við búin að athuga með flug en sigling var betri kostur.

Ferðin var áætluð 29.ág- 4.sept og farin þá.  Áætlaður fjöldi var 50 manns, ef ekki fengist í það hér heima athuga þá í Húnavatnssýslum og Siglufirði.
Við fengum fjöldann hér heima svo við þurftum ekki að fara annað.  Þegar leið að  brottför fór að hellast úr lestinni að venju, upp komu veikindi o.fl. sem hamlaði för fólks.  Þannig að þegar upp var staðið urðum við 46 með bílstjóra, sem okkur þótti bara gott. Bílstjóri var einnig leiðsögummaður  og þekkir Eyjarnar eins og puttana á sér.

29.ág. kl. 08:00 var síðan bíll frá Tanna mættur á Ábæ/N1 og ferðalangarnir sömuleiðis. Nokkrir teknir í Vamahlíð.
Áð á Glerártorgi til að tappa af og á. Dýrindis súpa var snædd í Selhóteli í Mývatnssveit.  Áætlað að koma á Seyðisfjörð vel fyrir kl.17:00 Þar nálguðumst við farseðla og klefanúmer,  sem við útbýttum síðan í bílnum. Lögðum frá bryggju kl. 20:00 þá var framundan 18 tíma sigling.  Þeir sem gerðu ráð fyrir sjóveiki voru búin annaðhvort að taka pillu eða setja á sig plástur.  Enginn varð sjóveikur enda haggaðist skipið varla.

30. ág.  lögðum við að bryggju í Þórshöfn, sem er í daglegu tali kallað Höfn, kl.15:00.  Þegar allir voru mættir í bílinn brunuðum við og skoðuðum Kirkjubæ. Eftir það fórum við að Hótel Færeyjum í innritun og síðan í kvöldmat þar kl. 19:00.

Næsta dag 31. ág. var skoðað í búðir í Höfn þannig að við gætum gengið að því sem við hefðum áhuga á á mánudag áður en við færum í ferjuna, ef við keyptum það ekki strax. Þennan dag fórum við í Vogar og Gásadal sem er minnsta byggð í Færeyjum.

Laugardaginn 1. sept ökum við til Gjáargarðs snæðum þar dýrindis súpu og skoðuðum okkur um þ.á.m. gjána sem garðurinn /þorpið heitir eftir. Þegar við komum til Hafnar skoðuðum við Norræna húsið þeirra. Það er mjög sérkennilegt og skemmtilegt.

Sunnudag 1.  sept ökum til Klakksvíkur og förum í kirkju þar.  Þarna var þoka, hávaðarok og ausandi rigning mjög lítið skyggni svo við fórum ekki lengra. Þarna bilaði bíllinn svo við fengum aðra rútu sem flutti okkur aftur til Hafnar.  Bílstjóri fór síðan aftur og skilaði rútunni og gerði við sína. Næsta dag var hún tilbúin fyrir okkur, hann var kominn á hótelið um kl 10:00 um kvöldið með allt klárt).

Mánudagur 3.sept.  Höfn að kaupa það sem við sáum á föstudag eða annað sem hver og einn vildi.  Áttum að vera mætt í Ferjuna milli kl. 12:00  og 13:00.  Siglt kl 14:00. Fengum gott í sjóinn. Komum til Seyðisfjarðar kl. 09:00 að staðartíma. Fórum í bílinn, þá var þar mætt önnur rúta til að fara með okkur norður. Hinni var ekki treystandi þurfti meiri lagfæringar eftir bilun gærdagsins.  Fórum yfir fjöllin með súpustoppi í Selhóteli Mývatnssveit.  Á Krók komum við kringun kl.17:30 og fór hver heim til sín. Allir sögðust hafa átt góða ferð og voru ánægðir.

Svenni bílstjóri dreif sig austur eftir 45 mínútna stopp, tappa af og tappa á, því hann var að fara aðra ferð með Norrænu næsta dag

Helga Sigurbjörnsdóttir formaður

Hér má sjá dagskrána okkar fyrir haustið 2018. Einnig hefur þessi dagskrá verið færð inn á flipann “dagskrá” sem hægt er að finna ef músin er færð yfir “starfið” hér efst á síðunni.

FÉLAG ELDRI BORGARA

Í  SKAGAFIRÐI.

             Samkomur eldri borgara til áramóta 2018

   í Húsi frítímans  – hefjast kl. 13.00.

Október: 

  1.  mánudagur –   félagsvist
4.  fimmtudagur – haustfundur – spil
 8.  mánudagur – bingó
11.  fimmtudagur – spil
15. mánudagur –  félagsvist
18. fimmtudagur – spil
22. mánudagur – bingó
25. fimmtudagur – spil
29. mánudagur – félagsvist

Nóvember:

 1.  fimmtudagur – spil
5.  mánudagur – bingó
8.  fimmtudagur – spil
12. mánudagur – félagsvist
15.  fimmtudagur – spil
19.  mánudagur – bingó
22. fimmtudagur – spil
26.  mánudagur – félagsvist
29.  fimmtudagur – spil

Desember:

3. mánudagur –   bingó
6. fimmtudagur – spil
10. mánudagur     félagsvist
13. fimmtudagur –  jólafundur
17. mánudagur – bingó   

Ath. Bílastæði eru einnig austanmegin við Hús frítímans, keyrt inná planið bak við  Rafsjá.

Leshópur: Miðvikudagar kl. 11.00 í Héraðsbókasafninu – Þórdís stjórnar, byrjar 26.sept.

Leikfimi: Miðvikudaga kl. 10.00 í Húsi frítímans – Guðrún Helga þjálfar, byrjar 26.sept.
Skráið ykkur hjá Herdísi í síma 864-9301.

Boccia:  Hús frítímans þriðjudaga og fimmtudaga kl. 10.00 – 12.00

Gönguhópurinn: Mánudögum og fimmtudögum kl 08.30. Mæting við Vallarhúsið á íþróttavellinum.

Kórinn: Æfingar í Ljósheimum á miðvikudögum kl. 15.00-17.00.  Nýir félagar velkomnir.
Uppýsingar veita Krummi  í síma  848-8327 ,  Bíbí í síma 453-5352 og Dísa í síma 898-6956.

Skákæfingar: Eldri borgarar eru boðnir velkomnir á skákæfingar hjá skákfélaginu í Safnaðarheimilinu á miðvikudögum kl. 20.00.

Samvera á Löngumýri: Helga og Inda bjóða til samveru þriðjudagana 2. og 23. október 6. og 20. nóvember og litlu jól 4. desember.
Byrjum að vanda kl. 13.30.

Handavinna og föndur í Húsi frítímans – byrjar miðvikudaginn  26. september kl.12.00-15.00.  Jóna og Helga taka vel á móti ykkur.

Matur á Kaffi-Krók:
Alla virka daga í hádeginu 12.30-13.30
Hlaðborð 1500 kr
Súpa og salat 1000 kr.

Matur á Hard-wok cafe:
15% af heildar reikningi. Auka 10% af tilboðum.

Heimavist FNV: Hádegishlaðborð virka daga 1000 kr.

Dagdvöl Aldraðra:

Dagdvöl í Skagafirði er ætluð öldruðum einstaklingum og er markmið hennar að bjóða upp á þjónustu sem auðveldar fólki að búa sem lengst á eigin heimili, þrátt fyrir hækkandi aldur og skerta færni.
Upplýsingar veitir Stefanía Sif Traustadóttir  sími 453-5909 GSM 692-5909.